Lögreglan á höfuðborgarsvæðinu leitar ökumanns sem ók litlum, gráum fólksbíl á gangandi vegfaranda á gangbraut á Víkurvegi í Grafarvogi í Reykjavík, nærri Egilshöllinni, þriðjudaginn 9. janúar um klukkan 19.08.

Vegfarandinn, 16 ára stúlka, fann fyrir eymslum og óþægindum í kjölfarið og leitaði á slysadeild daginn eftir slysið. Ökumaðurinn, kona með millisítt, dökkt hár og gleraugu og líklega á aldrinum 30 -40 ára, nam staðar stuttlega á vettvangi en hélt síðan för sinni áfram.

Við atvik eins og þetta er mikilvægt að ökumenn gangi úr skugga um að engin meiðsl hafi hlotist af né að skemmdir hafi orðið. Sömuleiðis er áríðandi að tilkynna málið til lögreglu, ekki síst vegna þess að áverkar eru ekki alltaf sjáanlegir á vettvangi.

Lögreglan biður umræddan ökumann um að gefa sig fram en hafi aðrir orðið vitni að slysinu eru hinir sömu beðnir um að hafa samband í síma 444 1000.                   Upplýsingum um málið má sömuleiðis koma á framfæri í tölvupósti á netfangið asgeir.gudmundsson@lrh.is eða í einkaskilaboðum á fésbókarsíðu Lögreglunnar á höfuðborgarsvæðinu.

 

Athugasemdir

Athugasemdir