Ástir dýrs og stúlku
Þótt teiknimyndarisinn Disney sé misvel þokkaður og muni seint fá Bleikan stein frá Femínistafélagi Íslands fyrir ötula baráttu gegn staðalímyndum þá verður ekki af fyrirtækinu tekið að það hefur heillað og skemmt börnum og foreldrum í 75 ár með áferðarfögrum teiknimyndum. Þær eru því ófáar perlurnar sem leynast í safni Disney en fyrirtækið er byrjað að dusta rykið af þeim fallegustu og endursýna á breiðtjaldi í þrívídd. Þannig fékk ný kynslóð að kynnast Konungi ljónanna nýlega og nú er röðin komin að Fríðu og Dýrinu.
Þrívíðri endurútgáfu The Lion King var mjög vel tekið enda hafði myndin ekki misst neitt af þeim töfrum sem hún hafði við frumsýningu árið 1994. Aðsóknin á endurútgáfuna var með allra besta móti og Disney er því eðlilega komið á bragðið og fylgir The Lion King nú eftir með The Beauty and the Beast. Myndin var frumsýnd fyrir rúmum tuttugu árum árið 1991 og sló í gegn bæði hjá áhorfendum og gagnrýnendum. Fríða og Dýrið hefur frá frumsýningu til þessa dags skilað 423 milljónum dollara, rúmum 52 milljörðum íslenskra króna, í miðasölu út um allan heim.
Fríða og Dýrið var fyrsta teiknimyndin í sögunni sem hlaut tilnefningu til Óskarsverðlaunanna sem besta myndin auk þess sem hún var tilnefnd í fimm öðrum flokkum; fyrir bestu tónlistina, besta hljóð, auk þess sem þrjú lög úr myndinni fengu tilnefningu. Myndin hlaut síðan tvenn verðlaun; fyrir bestu tónlist og besta lagið, The Beauty and the Beast. Myndin hlaut Golden Globe-verðlaunin sem besta myndin í flokki söngleikja- eða gamanmynda og hirti tvo aðra hnetti fyrir tónlist.
Sagan um Fríðu og Dýrið er sígild ævintýri sem kom fyrst út í Frakklandi árið 1740 undir titlinum La Belle et la Bête. Þekktasta útgáfan er stytting á sögunni sem kom fyrst á prenti 1756 og ári síðar í enskri þýðingu. Disney-myndin byggir á þessu gamla ævintýri auk þess sem sótt er í samnefnda kvikmynd frá árinu 1946.
Eftir að teiknimyndin sló í gegn fyrir tveimur áratugum hefur hún gengið endalaust í myndbandstækjum og DVD-spilurum ótal heimila um allan heim þannig að sagan flestum kunn. Myndin segir frá hinni ungu og fögru Belle sem annast roskinn og ringlaðan föður sinn og reynir að halda aftur af taumlausu áreiti hins hrokafulla og leiðinlega Gaston sem ætlar ekki að hætta fyrr en hann nær að festa sér stúlkuna með hjónabandi. Einhverja óveðursnóttina villist Belle úti í skógi og leitar skjóls í kastala. Þar ræður ríkjum heldur skapstyggt og ófétislegt skrímsli sem gerir öðrum íbúum kastalans, lifandi og talandi húsgögnum og búsáhöldum, lífið leitt með skapofsa sínum.
Belle kemst að því að skrímslið er í raun prins í álögum og það sama gildi um húsgögnin og eldhússáhöldin sem eru í raun þjónustufólk Dýrsins. Galdranorn sem prinsinn hafði sýnt hroka og dólgslega framkomu hneppti allt heila galleríið í álög til þess að kenna prinsinum mannasiði. Álögunum verður því ekki aflétt fyrr en Dýrið lærir að elska og fá manneskju til þess að elska sig. Útlitið er því síður en svo bjart þegar Belle villist inn í þunglyndislegan heim Dýrsins. Húsbúnaðurinn sér sér þó leik á borði og reynir að tendra ástarneista milli Fríðu og Dýrsins. Dýrið eygir einnig útkomuleið í Belle og heldur henni fanginni í kastalanum í þeirri von um að hún muni heillast af sér. Frekar hæpið. En eftir því sem kynni þeirra verða nánari vakna tilfinningar í hjörtum beggja.
Aðrir miðlar: Imdb: 8.0, Rotten Tomatoes: 92%.
