Deila

Gáfaðar græjur og skynjarar út um allt

Tækniráðstefnan CES 2017, sem snýr að tækninýjungum í alls kyns búnaði í daglega lífinu, fer fram í Las Vegas í Bandaríkjunum um helgina. Þar koma ýmsir framleiðendur saman til að kynna fyrir gestum nýjungar sínar og framtíðarlausnir sem engan grunaði að hann vantaði.

Nú eru fimmtíu ár síðan tækniráðstefnan CES var haldin í fyrsta sinn, en það var árið 1967. Og hvað er boðið upp á í tækniheimum á nýju ári? Jú, samkvæmt umfjöllun tæknifjölmiðla á netinu um ráðstefnuna, virðast skynjarar nú vera út um allt þessa dagana og sífellt bætast við nýir notkunarmöguleikar fyrir þá. Gáfur heimilstækjanna aukast í sama hlutfalli. Hér eru nokkur dæmi.

31478-bursti

L’Oréal fyrirtækið í París er leiðandi í heiminum þegar kemur að fegurðarmeðulum, förðunarvörum og góðilmi. Nú kynnir fyrirtækið nýja gerð gáfaðs hárbursta sem skynjar heilbrigði hársins og hvort réttum aðferðum sé beitt við notkun hans. Skynjarar og annar tæknibúnaður í burstanum lætur hann víbra þegar honum er beitt of harkalega og með skaðlegum áhrifum fyrir hárið. Upplýsingar um ástand hársins eru síðan sendar í smáforrit í síma notandans.

31478-d-vine

Annað franskt fyrirtæki, 10-Vins, býður fram einskonar tölvustýrðan vínþjón eða vínþjark, sem velur fullkomlega rétta aðferð við að hella víni í glas, enda er það ekkert grín. Framleiðendur græjunnar líkja henni við það að hafa sérmenntaðan franskan vínþjón inni á heimilinu. Passað er upp á hellingu og öndun vínsins í hvert sinn eftir ströngustu kúnstarinnar reglum og réttar aðferðir notaðar við hvert og eitt vín.

31478-hundaol

Blessuð gæludýrin eru ekki skilin útundan á tækniráðstefnunni. Hundaólarnar frá Kyon eru mjög gáfaðar. Þær gefa upplýsingar um líðan hundsins þíns beint í símann og gefa upp staðsetningu hans ef hann týnist. Hægt er að fylgjast með líkamshita dýrsins og ástandi þess, hvort hvutti er þreyttur, glaður eða þarf á göngutúr að halda.
Annað fyrirbæri, Catspad, sér um að gefa kettinum þínum að borða og drekka. Tækið skipuleggur máltíðir kattarins og veitir honum aðgang að fersku rennandi vatni.

31478-lamb

Þeir sem ekki vilja fylgjast með dýrunum sínum geta fundið sér nýjar leiðir til að fylgjast með börnunum sínum og líðan þeirra með hjálp nýjustu tækni. Leikfangalambið Dozer fylgist með svefni barna og gefur foreldrum upplýsingar um svefn þeirra. Það svæfir börnin jafnvel með tónlist sem lambið aðlagar að svefnvenjum þeirra. Ofurgáfað lamb þar á ferðinni.

31478-tekubbur

Með hjálp tækninnar á nú allt að verða fullkomnara en áður, jafnvel fyrirbæri sem hafa auðgað mannlífið árþúsundum saman. Með 42tea Smart Cube er sagt að tedrykkja nái nýjum hæðum. Teningur, sem settur er út í teið á meðan það tekur sig, fylgist með öllu saman, til dæmis hitastigi og beiskju vökvans. Upplýsingarnar eru, enn og aftur, sendar í sérstakt smáforrit sem gefur til kynna þegar tesopinn er orðinn fullkominn.

31478-sturta

Og ef öll þessi tækninotkun gerir þig úrvinda getur U, nýja sturtukerfið frá fyrirtækinu Moen, hjálpað þér að skrúfa frá sturtunni með farsímanum og stilla hitastig hennar alveg rétt. Þar getur þú látið líða úr þér eftir alla tæknina.

Auglýsing