Deila

Vildi íslenskar landsliðskonur til Kína

Sigurður Ragnar Eyjólfsson er þjálfari eins ríkasta kvennaknattspyrnuliðs í heimi, Jiangsu Suning í Kína, og er gert af eigendum þess að sigra í kínversku ofurdeildinni í ár. Til þess hefði hann viljað fá íslenskar landsliðskonur til sín. Hann furðar sig á Frey Alexanderssyni landsliðsþjálfara sem vildi ekki að landsliðskonurnar spiluðu í Kína. Hér segir hann frá ævintýralegri uppbyggingu kínverskrar knattspyrnu, heimsklassa aðstæðum og hvort peningar geti sigrað allt í fótbolta.

Þóra Tómasdóttir
thora@frettatiminn.is

„Ég fór til Kína í starfsviðtal þegar þeir voru að leita að þjálfara kínverska A-landsliðs kvenna árið 2015. Við vorum þrír sem komum til greina í starfið en á endanum var fyrrum landsliðsþjálfari Frakka ráðinn, góðkunningi okkar, Bruno Bini.“

Sigurður Ragnar hefur áður tekist á við Bruno Bini. Frakkar voru höfuðandstæðingar íslenska kvennalandsliðsins í undankeppni Evrópumeistaramótsins árið 2009. Þá stýrði Sigurður Ragnar íslenska liðinu og Bini því franska. Liðin unnu sinn heimaleikinn hvort en Frakkarnir voru með nokkuð sterkara lið.

Auglýsing

„Svo gerðist ekkert meira fyrr en ég kíkti niður í KSÍ í jólafríinu. Þá biðu mín skilaboð frá Kínverja sem hafði reynt að nálgast mig í gegnum knattspyrnusambandið. Sá sagðist vera að leita að þjálfara fyrir kvennalið Jiangsu Suning og spurði mig hvort ég hefði áhuga á starfinu. Það vildi þannig til að ég var nýbúinn að ganga frá starfslokasamningi sem aðstoðarþjálfari Lillestrøm í norsku úrvalsdeildinni, og var atvinnulaus. Ég var reyndar nálægt því að samþykkja tilboð frá bandaríska knattspyrnusambandinu, en varð svolítið spenntur fyrir að skoða þetta. Úr varð að ég fór í viðtal til Kína ásamt Daða Rafnssyni sem var lengi yfirþjálfari Breiðabliks og hefur kennt á þjálfaranámskeiðum KSÍ. Í kjölfarið voru okkur boðnar stöður þjálfara og aðstoðarþjálfara liðsins. Við fluttum til Kína 22. janúar og höfum því verið hér í mánuð.“

32228 siggi raggi
Leikmenn Jiangsu Suning

Á að vinna deildina

Sigurður Ragnar segir ástríðu hans fyrir þjálfarastarfinu hafi ráðið úrslitum og orðið til þess að hann valdi Kína fram yfir Bandaríkin.
„Í Kína bauðst mér aðalþjálfarastarf. Í langflestum þjálfarastörfum hefur þú úr litlu fjármagni að moða til að geta eflt liðið. Hjá Jiangsu Suning er því eiginlega öfugt farið. Þetta er eitt ríkasta félag í heimi í kvennaknattspyrnu. Við getum keppt við hvaða lið sem er í launum leikmanna. Það sem mér þótti líka spennandi við verkefnið var að liðið féll næstum því úr kínversku ofurdeildinni í fyrra. Á miðju keppnisári kom fyrirtækið Suning inn sem styrktaraðili og þeir höfðu gríðarlegan metnað til að skapa lið í fremstu röð. Eitt af markmiðunum sem þeir hafa sett sér í ár, er að vinna kínversku ofurdeildina.“

–Og þú berð ábyrgð á að ná þessum markmiðum?
„Já. Reyndar var talað um það þegar ég tók við liðinu að við myndum reyna að ná einu af þremur efstu sætum deildarinnar. Nú hefur klúbburinn gefið út að þeir vilji að kvennaliðið verði meistarar. Þær voru 16 stigum frá því í fyrra og það eru aðeins 8 lið í deildinni, sem þýðir að þær voru ansi langt frá því að vinna. Það eru því háleit markmið að vilja sigra í deildinni.“

Öllu tjaldað til

Sigurður Ragnar óttast ekki áskorunina og heldur nú til í Suðaustur-Kína þar sem æfingaaðstaða félagsins er. „Æfingasvæði okkar er um það bil 30 mínútum fyrir utan borgina. Félagið hefur gert atvinnumannasamninga við 53 leikmenn sem búa frítt á svæðinu og eru á fullum launum. Æfingaaðstaðan er til fyrirmyndar með tíu æfingavöllum, gervigrasvelli, flóðlýstum leikvangi sem tekur mörg þúsund manns í sæti, stóru íþróttahúsi með lyftingatækjum, sundlaug og mötuneyti þar sem allir borða frítt þrjár máltíðir á dag. Þannig geta leikmenn verið á fullum launum og einbeitt sér að fótbolta allan ársins hring. Heimaleikir kvennaliðsins eru svo spilaðir á 22 þúsund manna leikvelli. Karlarnir leika á 62 þúsund manna leikvangi og að meðaltali koma um 30 þúsund manns á leikina þeirra. Nú er klúbburinn að byggja nýtt æfingasvæði sem mun nýtast okkar liði í framtíðinni. Þá verður ekkert til sparað því þeir vilja gera hlutina eins vel og hægt er.“32228 sigurður ragnar eyjólfsson 2

-Er áhugi fyrir kvennaknattspyrnu í Kína?
„Já, hann er að aukast en hann er ekki jafn mikill og á karlaboltanum.“

Mikil breyting varð á Jiangsu klúbbnum þegar kínverska fyrirtækið Suning gerðist aðal styrktaraðili hans. „Þeir keyptu líka ítölsku risana Inter Milan í fyrra og ætla að gera þá að einu besta liði í Evrópu. Suning er risafyrirtæki og þar vinna um 200 þúsund manns, eða álíka margir og eru á íslenskum vinnumarkaði. Stefnan hjá þeim er að verða stærsta fyrirtækið í Kína árið 2020. Fyrirtækið byrjaði á því að selja loftræstikerfi en er nú á Asíumarkaði að gera svipaða hluti og Amazon, Youtube og Walmart, auk þess að vera umsvifamiklir á fasteignamarkaði, fjármálamarkaði og í netsölu. Þeir eru sem sagt að vasast í ansi mörgu.“

Sigurður Ragnar segir mikla uppsveiflu í kínverskri knattspyrnu. „Fótbolti hefur verið talsvert mikið stundaður í Kína en á undanförnum árum hafa stórfyrirtæki keypt flest félögin í kvenna- og karlaboltanum og komið inn með gríðarlegt fjármagn. Uppsveiflan byrjaði karlamegin og nú eru þekktir leikmenn og þjálfarar komnir inn, líka í næstefstu deildirnar. Það er vilji hjá Kínverjum til að búa til sterkar deildir hjá bæði körlum og konum og koma landsliðum þeirra í fremstu röð. Þeir hafa fjárfest gríðarlega í uppbyggingu aðstöðu, þjálfunar- og knattspyrnuskólum og ég fullyrði að ekkert land vex jafn hratt í knattspyrnu og Kína.“

-Var það pólitísk ákvörðun að efla knattspyrnumenningu í landinu?
„Já, forseti Kína er mikill áhugamaður um knattspyrnu. Hann hefur mikinn áhuga á að knattspyrna fái aukið vægi í skólum og verði hluti af námskrá bæði hjá strákum og stelpum. Til stendur að opna tugi þúsunda knattspyrnuskóla í landinu á næstunni. Sumir þeirra verða styrktir af félögum í Evrópu. Erlend knattspyrnusambönd hafa líka þjálfað kínverska þjálfara og spænska knattspyrnusambandið er með þjálfaranámskeið hér úti, svo eitthvað sé nefnt. Svo hafa heimsþekktir þjálfarar tekið til starfa í kínversku ofurdeildinni.“

Með túlk í öllum samtölum

Sigurður Ragnar segir það hafa gengið stóráfallalaust fyrir sig að aðlagast nýjum menningarheimi en hann hafi þurft að tileinka sér nýjar starfsaðferðir í mörgu. „Það voru til dæmis viðbrigði að fara að þjálfa með túlki, hann endurtekur allt sem ég segi á kínversku. Öll samtöl sem ég á við leikmenn þurfa að fara í gegnum túlk því langfæstar stelpnanna skilja ensku. Þetta gengur ágætlega og samskiptin við klúbbinn og mína yfirmenn hafa verið til fyrirmyndar. Þau vilja byggja upp klúbb í fremstu röð og hafa reynt að verða við öllum mínum óskum. Ég finn mikinn stuðning frá þeim.“

-Hverjar voru þínar kröfur þegar þú réðst þig inn í þessar heimsklassa aðstæður?
„Ég vildi kaupa tvo erlenda leikmenn, framherja og miðjumann. Þeir samþykktu það. Báðar eru nýir og frábærir leikmenn. Brasilíska landsliðskonan Gabriela Zanotti og norska landsliðskonan Isabell Herlovsen sem var samningsbundin við Lillestrøm. Við þurfum að kaupa hana þaðan fyrir meiri pening en nokkur hefur borgað fyrir norskan leikmann áður. Félagið okkar var tilbúið að setja peninga í það. Hin liðin í deildinni hafa einnig keypt til sín erlendar landsliðskonur og því stefnir allt í að margir heimsklassa leikmenn spili í deildinni í ár. Við megum kaupa einn útlending í viðbót, en samkvæmt reglunum mega aðeins tveir útlendingar spila inn á í einu. Félagaskiptaglugginn er lokaður þar til í júlí, þá getum við bætt við einum í viðbót.“

Ósammála á landsliðsþjálfaranum

Eins og fram kom í Morgunblaðinu fyrir nokkrum dögum, reyndi Sigurður Ragnar að fá til liðs við sig íslensku landsliðskonurnar Hallberu Guðnýju Gísladóttur og Dagnýju Brynjarsdóttur. Freyr Alexandersson landsliðsþjálfari greindi svo frá því á vefnum 433.is að hann hefði gert leikmönnum landsliðsins grein fyrir því að samningar við kínversk félög myndu hafa áhrif á stöðu þeirra gagnvart landsliðinu. Hallbera Guðný og Dagný höfnuðu því tilboðum frá Sigurði Ragnari, þrátt fyrir að boðin hafi verið þau hæstu sem þær hafa fengið á ferlinum.

26297 Hallbera Gudny
Hallbera Guðný Gísladóttir landsliðskona

„Mér finnst fordómar ríkja á Íslandi gagnvart kínverskri knattspyrnu. Þeir skína í gegn í viðtölum til dæmis við Frey Alexandersson landsliðsþjálfara, þar sem hann talar niður styrkleika kínversku deildarinnar og segir hana ekkert sérstaka. Allar kínversku A-landsliðskonurnar spila í deildinni og landsliðið hér er 7 sætum ofar en Ísland á heimslistanum. Einn besti og launahæsti leikmaður í heimi, brasilíska landsliðskonan Christiane, mun spila með einu liði í deildinni í ár. Fleiri sterkar erlendar landsliðskonur spila í deildinni. Mér finnst fólk almennt dæma kínverska knattspyrnu af einsleitum fréttaflutningi. Eins og fólk líti þannig á að kínverskir peningar séu verri en enskir peningar eða peningar frá öðrum löndum. Kínverjum er hinsvegar full alvara með sinni uppbyggingu. Þeir hafa sett takmarkanir á útlendingafjölda hvers liðs til þess að kínverskir leikmenn fái tækifæri til að þroskast í sinni deild og verða betri. Mér finnst aðdáunarvert að mörg af stærstu fyrirtækjum í Kína taka virkan þátt í að byggja upp karla- og kvennaknattspyrnu til jafns og ekki síst barna- og unglingaknattspyrnu. Ég held að nú standi yfir bylting í kínverskri knattspyrnu og þeir hafa langtímamarkmið í huga.
Mér finnst það orka tvímælis að landsliðsþjálfarinn tali niður deildina með því að segja að hún sé ekki fyrir íslenskar knattspyrnukonur og ekki fyrir leikmenn sem ætli sér að spila í lokakeppni Evrópumótsins sem er framundan.
Leikmenn sem við vorum í viðræðum við, vissu að þær mættu taka þátt í öllum landsliðsverkefnum fyrir Evrópumótið, þó þær réðu sig til Kína. Mér finnst Freyr vera á hálum ís með því að segja að ef leikmenn spili í Kína, þá hafi það áhrif á val hans í landsliðið. Ég spyr á móti hvert vandamálið sé við að spila í kínversku deildinni? Meirihluti landsliðskvenna spilar í áhugamannadeild á Íslandi þar sem keppnistímabilið er styttra, liðin eru ekki með jafn góða erlenda leikmenn og leikmenn geta ekki einbeitt sér að því eingöngu að spila knattspyrnu. Er vandamálið hvað Kína er langt í burtu? Ég ræddi það við Frey og landsliðskonur sem ég hafði áhuga á að fá hingað, að þær myndu ekki missa af undirbúningi né leikjum á EM. Hvers vegna vill hann þá ekki að þær spili í Kína? Eru það fordómar gagnvart kínverskri knattspyrnu? Mega konur ekki þéna vel á sinni knattspyrnuiðkun, eins og karlar? Ég minnist þess að hafa lesið umfjöllun fyrir stuttu um að íslensk landsliðskona hefði ekki einu sinni efni á mat. Það voru þrír íslenskir leikmenn valdið í karlalandsliðið á meðan þeir spiluðu í Kína, þeir Eiður Smári Guðjohnsen, Viðar Örn Kjartansson og Sölvi Geir Ottesen. Þetta hefur þótt nógu gott fyrir karlalandsliðið, hvers vegna er þetta ekki nógu gott fyrir kvennalandsliðið? Mér finnst þetta réttlætismál fyrir íslenskar landsliðskonur.“

Kaupir ekki góðan liðsanda

Að sögn Sigurðar Ragnars vinna um hundrað manns með félögunum þremur, Inter Milan, karla- og kvennaliði Jiangsu Suning. „Hjá þeim höfum við aðgang að sérþekkingu í hvíld og endurhæfingu leikmanna og tæknilegum atriðum sem varða þjálfun. Þetta er ofboðslega stórt batterí og við finnum að þeir styðja hundrað prósent við bakið á okkur. Ekki eins og hjá sumum félögum sem þykja kvennaliðin skipta minna máli og styðja þau bara að nafninu til. Nú er talað um að fara með kvennalið okkar í æfingaferð til Evrópu og það sést á allri umgjörð að félaginu er alvara með að byggja upp topplið.“

-Er hægt að kaupa allt fyrir peninga til að skapa framúrskarandi lið?
„Ég veit það ekki. Það er hægt að kaupa góða leikmenn og góða aðstöðu. En þeir efla ekki sjálfkrafa hugarfar leikmanna þinna. Þú getur ekki keypt sigurvilja, liðsmenningu eða góðan liðsanda. Peningar búa ekki til leikskipulag og vinnuframlag í leikjum. Þannig að það er margt sem þjálfari þarf að koma inn hjá liðinu sínu og svo er þetta undir leikmönnunum komið.“

Ef þú telur að Fréttatíminn eigi erindi getur þú styrkt útgáfu blaðsins með því að gerast stofnfélagi í Frjálsri fjölmiðlun, stuðningsfélagi óháðrar blaðamennsku og Fréttatímans. Með framlagi sínu efla félagar ritstjórn Fréttatímans og færa blaðið til fleiri heimila.

Frjáls fjölmiðlun í almannaþjónustu er mikilvæg undirstaða heilbrigðs samfélags og nauðsynlegt mótvægi við þá fjölmiðla sem nú eru komnir í eigu sérhagsmunaaðila.