InnlentMætingarskylda í flug

Ritstjórn Fréttatímanns1 mánuður síðan3 min

 

Frá árinu 2017 hafa Neytendasamtökin barist fyrir afnámi mætingarskyldu flugfélaga, svokallaðri „No-show“ reglu. Hún er þannig að mæti farþegi ekki í fyrri legg flugferðar, fellir flugfélagið niður alla aðra leggi ferðarinnar án þess að endurgreiða farmiðana. Þessi regla tíðkast ekki í neinum öðrum viðskiptum og er ólögleg að mati Neytendasamtakanna, enda í hæsta máta ósanngjörn.

Í Evrópu hafa neytendasamtök barist mjög gegn skilmálunum. Hægt og sígandi hefur árangur náðst og dómar fallið gegn þessum skilmálum,

Breska flugmálastjórnin birti skýrslu í júní þar sem þessir skilmálar voru sagðir ósanngjarnir, ógagnsæir og halla verulega á neytandann. Þó flugmálastjórnin aðhefðist ekki í málinu að sinni, segir í skýrslunni að neytendur gætu sótt fyrirtækin til saka fyrir skilmálana. Bresku neytendasamtökin (Which?) mótmæltu þessari afstöðu og hvöttu stjórnvöld til að stöðva þessa lensku flugfélaga með lagasetningu.

Belgísku Neytendasamtökin TestAchats hefur stefnt Air France og KLM fyrir mætingarskylduna og er dóms að vænta í september.

Dómur í mætingarskyldumáli gegn Air France féll í júnílok. Þar var Air France dæmt til að endurgreiða farþega €128,02 vegna kaupa á farmiða, €500 í miskabætur og €800 í málskostnað. Dómurinn tók þó ekki beint á mætingarskyldunni.

Neytendasamtökin hafa ítrekað beint því til Icelandair að fyrirtækið láti af mætingarskyldunni, enda séu það furðulegir viðskiptahættir að meina viðskiptavinum að nýta þjónustu sem þeir hafa greitt fyrir. Boltinn er hjá Icelandair og mun mætingarskylda í flugferðir vonandi heyra sögunni til innan skamms.

Ritstjórn Fréttatímanns

Fréttatíminn er óháður miðill.

Má bjóða þér að styrkja óháða blaðamennsku?

Hefur þú áhuga á að hjálpa Fréttatímanum að vaxa og dafna?
Með því að styrkja Fréttatímann stuðlar þú að frjálsri og óháðri umfjöllun.

Styrkir fara í gegnum Paypal og eru í Bandaríkjadollar. Unnið er að því setja upp styrki í íslenskri mynt.