FólkInnlentHátt í 3000 manns leituðu að Bjarna án árangurs

Ritstjórn Fréttatímanns3 vikur síðan6 min

 

BJARNI MATTHÍAS SIGURÐSSON hvarf þann 25. ágúst árið 1974

BJARNI MATTHÍAS SIGURÐSSON

Bjarki Hólmgeir Halldórsson tók efnið saman

Bjarni Matthías Sigurðsson var fæddur 29. nóvember 1894 og var búsettur í Ólafsvík. Hann var giftur Vigdísi Lydíu Sigurgeirsdóttur og áttu þau sex börn, Vigdís lést 1975. Bjarni var trésmiður og járnsmiður og var vinsæll meðal þeirra sem hann þekktu. Hann rak meðal annars vélsmiðju í Ólafsvík.

Bjarni var mikill útivistamaður og var vel heilshraustur þrátt fyrir að vera orðinn 79 ára gamall en var þó farinn að tapa minni og grunar ættingja að hann hafi verið kominn með alsæmer á byrjunarstigi.

Þann 25. ágúst 1974 fór hann til berjatínslu ásamt dóttur sinni og tengdasyni skammt frá Hólahólum á Snæfellsnesi. Bílnum var ekið spölkorn upp vegslóða frá aðalveginum þar sem honum var lagt og hafist handa við berjatínslu. Hann var klæddur í blá nankins föt, með köflótta húfu eða svo kallaðan sixpensara. Hann var með rauða fötu undir berin og berjatínu sem hann hafði smíðað sjálfur. Þegar fólkið hafði tínt ber í góða stund ákvað Bjarni að fara aftur til bifreiðarinnar og fá sér kaffisopa. Samferðafólk hans fór svo um fimmtán mínútum seinna til sömu erindagjörða en þá var Bjarni hvergi sjáanlegur.

Þau svipuðust um eftir honum en þegar það skilaði engum árangri, tilkynntu þau hvarfið og hófst þá umfangsmikil leit. Það sýnir vel þann samhug sem býr í fólki að bátar fóru ekki á sjó daginn eftir hvarf Bjarna og mest allt atvinnulíf lamaðist í Ólafsvík sem og víðar á Snæfellsnesi því fólk vildi aðstoða við leitina. Þegar leitin stóð sem hæst tóku hátt í 3000 manns þátt í henni. Einnig var notast við þyrlu við leitina. Segja má að hver einasti fersentimeter hafi verið kannaður oftar en einu sinni og oftar en tvisvar á þeim slóðum sem Bjarni hvarf.

Sporhundur var kallaður til. Hann rakti slóð Bjarna frá þeim stað er þau höfu lagt bifreiði sinni og upp á aðalveg, þar endaði slóðin. Það vakti ákveðnar grunsemdir og eru ættingjar hans sumir hverjir þess full vissir að þar hafi einhverskonar slys átt sér stað sem hafi endað með saknæmu athæfi. Sonur Bjarna segir í þáttunum Óupplýst Mannshvörf sem voru sýndir á Stöð 2 ,,það var leitað það vel á svæðinu að hann hefði fundist ef hann væri þarna“.

Aldrei fannst neitt sem skýrt gat hvarfið, hvorki rauða fatan, berjatínan eða nokkuð annað. Gott veður var þennan dag og næstu daga á eftir. Auglýst var eftir honum í fjölmiðlum bæði á íslensku og ensku. Leitað var aftur vorið 1975 þegar snjóa létti eftir veturinn en sem fyrr án árangurs. Minningarathöfn fór fram um Bjarna Matthías Sigurðsson frá Ólafsvíkurkirkju 30. nóvember 1974.

Lögreglan tekur að sjálfsögðu við ábendingum um málið. Búir þú yfir upplýsingum eða vilt koma á framfæri ábendingu varðandi ofangreint, eða önnur mannshvörf er þér bent á að hafa samband með tölvupósti. Póstfangið er mannshvarf@gmail.com

Ritstjórn Fréttatímanns

Fréttatíminn er óháður miðill.

Má bjóða þér að styrkja óháða blaðamennsku?

Hefur þú áhuga á að hjálpa Fréttatímanum að vaxa og dafna?
Með því að styrkja Fréttatímann stuðlar þú að frjálsri og óháðri umfjöllun.

Styrkir fara í gegnum Paypal og eru í Bandaríkjadollar. Unnið er að því setja upp styrki í íslenskri mynt.