FréttirInnlentViðskiptiGrái herinn skorar ríkið á hólm í réttarsölum

Ritstjórn Fréttatímanns3 vikur síðan4 min

 

Stofnaður hefur verið sérstakur málsóknarsjóður til að vera fjárhagslegur bakhjarl málaferlanna

Grái herinn, aðgerðarhópur innan Félags eldri borgara í Reykjavík, þingfestir á næstunni mál gegn ríkisvaldinu til að freista þess að fá margumtalaða skerðingu lífeyris almannatrygginga dæmda ólöglega. Sækjendur búa sig undir að málið fari upp í gegnum öll þrjú dómstig landsins, hver svo sem niðurstaðan verði og leitað verði í framhaldinu til Mannréttindadómstóls Evrópu ef nauðsyn krefji.

Finnur Birgisson
Finnur Birgisson talsmaður Gráa hersins

Finnur Birgisson, arkitekt og talsmaður Gráa hersins, upplýsti þetta á fulltrúaráðsfundi Birtu lífeyrissjóðs í síðustu viku. Málflutningsstofa Reykjavíkur flytur málið fyrir hönd þeirra sem höfða það að frumkvæði Gráa hersins og útlit er fyrir að málareksturinn hefjist síðar á þessu ári að sögn Birtu.

Stofnaður hefur verið sérstakur málsóknarsjóður til að vera fjárhagslegur bakhjarl málaferlanna. Stofnendur eru 33 félög eldri borgara í öllum landshlutum og fyrirliggjandi eru loforð frá verkalýðsfélögum um að leggja 2,8 milljónir króna í sjóðinn.

Betur má ef duga skal því ætla má að málskostnaður hlaupi á tugum milljóna króna. Verkalýðshreyfingin lofar frekari stuðningi og gert er ráð fyrir söfnunarátaki þegar fram líða stundir og þörf krefur.

Finnur nefndi ýmis rök fyrir málatilbúnaði Gráa hersins og bar sömuleiðis íslenska lífeyriskerfið saman við erlend eftirlaunakerfi:

  • Skerðing lífeyris almannatrygginga er í mótsögn við forsendur lífeyrissjóða þegar þeir voru stofnaðir á sínum tíma. Þá var litið svo á að lífeyrir úr sjóðunum yrði viðbót við lífeyri almannatrygginga.
  • Skerðing almannatrygginga jafngildir jaðarskattheimtu upp á 65-84% og þar með eignaupptöku.
  • Íslenska kerfið byggist á stærri hluta söfnunar í lífeyrissjóði en gerist annars staðar. Lífeyrir frá ríkinu vegur minna.
  • Útgjöld íslenska ríkisins vegna lífeyris aldraðra eru miklu minni en gerist annars staðar á Norðurlöndum.
  • Tekjutengingar í opinbera kerfinu á Íslandi eru miklu meiri en þekkjast annars staðar.

Ritstjórn Fréttatímanns

Fréttatíminn er óháður miðill.